الاستقرار مش جاي من عمر سليمان

بيقولوا ان اللي ماعندوش ولاد ولا مسؤولية هو اللي مش حينتخب عمر سليمان.

ولادنا...الثورة قامت ليه؟ عشان ولادنا يكبروا في دولة كويسة. عشان يلاقوا وظيفة كويسة، وتعليم كويس، وبيت كويس يعيشوا فيه. والثورة لازم تكمل عشان ما يحتاجوش هم كمان ينضربوا ويتسحلوا في الشوارع زي اهلهم.

انت فكرك الثورة حتقف لو عمر سليمان والا شفيق مسكوا؟ دي حتولع عشر مرات. الاستقرار ما بيجيش من القسوة، الاستقرار بييجي من العدل.

انت فاكر لما رئيس قمعي (انت مسميه "راجل") يمسك الحكم الثورة حتقف؟ شوف سوريا: بيدبحوا الناس بالسكينة زي الغنم، وبيسلخوهم احياء، وكل يوم المظاهرات بتزيد. لأن الناس قرفت. لان الاستقرار ما بيجيش من الضرب والسحل. الاستقرار بييجي من العدل. احنا نفسنا الثورة تقف النهاردة قبل بكرة، بس تقف على عدل. هم اللي بيولعوا فيها. هو احنا اللي عملنا احداث بورسعيد؟ هو احنا اللي عملنا احداث محمد محمود؟ ده احنا كنا بنتظاهر عشان الكلام ده ما يحصلش تاني.

تفتكر احنا صحيح فاضيين وبندور على حاجة نهيص عليها؟ تفتكر بنحب نتخانق مع دبان وشنا؟ انا مبرمج، وعندي مشاريع قد كدة تعليم ونهضة، وعندي شركة عاوز افتحها. بس ما ينفعش اسيب البنات يتسحلوا واسكت. مش دي الرجولة ولا ده اللي حيجيب الاستقرار. الاستقرار مش من السحل. الاستقرار من العدل.

انا نفسي افضى لشغلي ولحالي، ولبناء المجتمع ومكافحة الفقر والبطالة. انما اللي بيحارب الاستقرار فعلاً هم مش احنا: يمشي حسني يجيبوا طنطاوي، يمشي طنطاوي يحيبوا سليمان. كل ما نيجي نقول خلصنا ياللا نبني البلد نلاقيهم مصرّين يفضل الحرامي حرامي والظالم ظالم.

فكرك عمر سليمان - مرشح المجلس العسكري اللي راح لجنة الانتخابات والشرطة العسكرية بتحرسه - هو اللي حيجيب الاستقرار؟ لو كان نفسهم في الاستقرار صحيح كانوا جابوا فلوس حسني المتهربة من برة. كانوا وقفوا تصدير الغاز. كانوا حلوا المشاكل.

فكرك البلطجية حيسكتوا لما عمر سليمان يمسك؟ طيب فكر كدة: لو رئيس جه عشان الناس خايفة من البلطجية، حيشيل البلطجية ليه؟ مش جه بسببهم؟ ومش هم اللي بيسلطهم على الثوار؟ مشيانهم معناه نهاية حكمه..لا حيسيبهم ويغذيهم كمان من فلوسنا.

وحيحارب الفقر ليه؟ هو لولا الفقر كان عرف يشتري الاصوات؟ كل ما الفقر زاد كل ما الناس باعت كرامتها. ده شكل البلد اللي هو عايزه طبعاً.

المرشحين التانيين عندهم برنامج للامن عاملينه خبراء. عاملين برامج للعدالة. لأ مش نصابين، دول ناس اتسجنوا وكافحوا طول عمرهم عشان مبادئهم -- دي فرصة الاستقرار الحقيقية: دول ما لهمش مصلحة في البلطجية والضرب..دول عاوزين الناس تهدا عشان البلد تتبني. عشان ولادنا. عشان نعمل دولة حديثة. كفاية ذل بقى.