انت ممكن تكون بتفكر ان الثورة دي ما لهاش لازمة. ان حسني كان حرامي بس محافظ على الاستقرار. ان العادلي كان ظالم بس كان مخوف المجرمين، والانفلات الأمني ما كانش عمره حيبقى كدة لو العادلي كان موجود.
أو ممكن تكون حاسس ان الثورة كانت صح، بس الشباب زودوها بقى، ايه اللي خلاهم يمشوا احمد شفيق، ماهو كان حيظبط البلد، صح؟ ايه اللي خلاهم كل شوية مظاهرات مظاهرات. دول عيال زبالة مش فاهمين الدنيا ومش عاجبهم حاجة في عيشتهم.
كان ايه اللي جبرنا على ده كله...عيال خايبة...
عاوز احكي لك حكاية: حسني كان عاوز يعمل انتخابات رئاسية في سبتمبر 2011، يعني كان زماننا دلوقتي بيحكمنا راجل ما بين الحياة والموت. أو كان زمان بيحكمنا ابنه دلوقتي.
وسواء حسني أو ابنه، كان الحزب الوطني ماسك في كل حاجة، الحزب الوطني يعني رجال أعمال، بيفصلوا القوانين عشان البيزنس. يعني ممكن واحد يوقف بيع الطيور الحية عشان يجامل صاحبه بتاع الفراخ المجمدة. يعني مافيش شقق تتبني عشان يكسبوا من الحديد. يعني اكل وشرب وسكن الناس مشاركينهم فيه.
والأنكت من كدة: فاكر لما كانوا بيبيعوا الأراضي في 2007؟ هو ايه اللي يتبقى من البلد غير الأرض؟ عارف -- البلطجية حيقعدوا يبرطعوا كام شهر؟ قول حتى سنة، قول حتى سنتين، انما دول كانوا عاوزين يقعدوا ميت سنة، ويسلموها لبعض كل ما يمشوا.
والبلطجي حيسرق منك بيت والا عربية، والا حتى يخطف واحد، انما ما كانش حيبيع البلد كلها. واحسب عموما الناس اللي ماتوا من الجوع، ومن الأدوية المغشوشة، واللي وقعت عليهم بيوتهم، واللي ماتوا في المعتقلات، واللي غرقوا، وشوف الثورة جابت البلطجية صحيح والا البلطجية كانوا اللي قاعدين من قبلها..
وبعدين يا أخي البلطجي ممكن تدافع عن نفسك منه، انما الحكومة اما تسرق حتعمل ايه؟ حتفتح بقك حيطلعوك انت المجرم اصلاً، وتروح ورا الشمس...
طيب ليه بيتظاهروا لغاية دلوقتي؟ مش كان كفاية بقى ويهمدوا؟ حاقول لك...
الحرامي اللي ذاق النهب مش حيهدا، والحزب الوطني نفسه يرجع، والوزرا نفسهم يقعدوا، ولسة فيه ناس ذممهم خربانة؛ واحشهم بيع البلد عشان الفراخ المجمدة. عاوزين يملكوا البلد ويدوسوا علينا وعلى ابو أمنا.
احمد شفيق كان سايب وزرا من النظام القديم؛ وكان تفكيره تفكير نظام قديم، وكان دماغه ناشفة ومايستحملش حد يقول له بم: ولو جينا نشيل الفاسدين من كل حتة كان حيقرفنا في عيشتنا ومش حناخذ منه حاجة في الآخر.
عصام شرف له مشاكل كثير، بس فيه حاجات كويسة حصلت معاه بننساها: انتخابات نزيهة في الجامعات[جت بالعافية اصلا]، في النقابات، محاكمة الوزرا القدام، محاكمة علاء وجمال وزكريا عزمي [خليهم على الأقل ينشغلوا بالمحاكمة بدل ما ينشغلو بالرجوع للسلطة]. كل حاجة من دول كانت خازوق في وش الفاسدين؛ لأنهم كانوا مسيطرين اصلا على البلد حتى بعد حسني..ولو ما مشيوش كان ممكن شوية شوية يرجعوا للحكم تاني. وعموما مش دور شرف - أو غيره - انه يقعد ميت سنة، دوره انه يضبط البلد لغاية ما يبقى فيه انتخابات مجلس شعب عدلة ورئيس عدل ونختار بقى اللي احنا عايزينه بالورقة والقلم؛ ويبقى مافيش حوجة للمظاهرات اصلا.
المظاهرات اللي حصلت كانت شد وجذب: مظاهرة جابت محاكمة، مظاهرة جابت قانون احسن للانتخابات، مظاهرة شالت حد فاسد. مش كل حاجة مظاهرات، معاك حق، ومش كل مظاهرة جابت نتيجة صح، بس برضه مش كل مظاهرة غلط؛ فيه مظاهرات كانت محتاجينها. الشباب دول مش عاوزين غير المصلحة، وضحوا بصحتهم وحياتهم وحريتهم عشان البلد؛ ولغاية دلوقتي لسة بيعتقلوا كل يوم والناس يقولوا اصلهم يستاهلوا..وحسني قاعد بيه في المستشفى وفالحين يقطعوا ويسحلوا في دول.
طيب انا باقول لك كدة ليه؟ عشان البلد دي كويسة وتستاهل. عشان عاوزين نخلص بقى. عشان عاوزين نشيل الفاسدين والحال ينضبط ونعيش بقى. طب تعمل ايه؟ اعمل كل حاجة تقدر عليها يا سيدي، وانا حاقول لك شوية افكار آهي:
- ما تقعدش في البيت يوم الانتخابات، شوف ايه حكاية الدايرة والفرد والقايمة وانتخب؛ بس خلي بالك من بتوع الحزب الوطني!! حتقول لي تعقيد وقرف اقول لك قرف يوم ولا قرف عمر بحاله.
- لما ييجي وقت الانتخابات الرئاسية ما تنتخبش فلان عشان شكله جدع، أو عشان "قديم"، أو الكلام ده. اللعب بقى على كبير يابا واللي حيحكم حيأثر على مستقبل البلد كلها، لازم تشوف التفاصيل وتفكر وتدقق.
- تابع الحالة السياسية، شوف ايه القضايا وحاول تفهمها، بس ما تصدقش كل حاجة يقولها الإعلام.
- اعرف ان الحرية مش كلام فارغ. والديموقراطية مش بس كلام مثقفين: الحرية يعني انك تعرف تقول للحرامي يا حرامي من غير ما تروح المعتقل. الديموقراطية يعني مش اي حمار يحكم ويقول يا ارض اتهدي ما عليكي قدي. عارف؛ من اسبوعين كان فيه انتخابات عمادة في الكلية بتاعتي، كل واحد مرشح لم الدكاترة والمعيدين وقعد - يمكن لأول مرة في حياته - يشرح للناس ليه هو يستاهل يبقى عميد، ويعترف بمشاكل الكلية وحلولها، وحتى عيبوبه الشخصية ممكن يتكلم عنها ويواجهها. تخيل لو البلد كلها بقت كدة ايه اللي حيحصل.
- دي قيمة الحرية، طب ايه ثمنها؟ انك تقرأ وتفهم وتتابع، انك تنتخب وتشارك، أو حتى بكلمة تقولها: تحذر واحد من انتخاب راجل فاسد، تقول لحد قريبك تعال معايا انتخب، أو حتى ساعات يعني - عارف - مظاهرة لو كانت في الحق.
البلد ظروفها صعبة قوي. بس هي تستاهل. شد حيلك يا اخي.
ليست هناك تعليقات:
إرسال تعليق